Kuch Hai...

Kuch hai andar jo sulag raha hai

Kuch purana sa

Jo naye se ulajh raha hai

Ajeeb si bechaini hai

Sab kuch kar chuki taar taar

Fir bhi dhaar ab tak paini hai

Kya baaki hai

Khatam karne ke liye

Bas zinda hain hum ab

Har roz marne ke liye

Saanson ka aana

Saanson ka jaana

Fir chupa lena wo aansu

Karke naya bahana

Dard ke humdard

Ab ban gaye hain

Naye raaston par puraane

Manzar tham gaye hain

Bas bahut hua

Bahut hua

Ab chehron mein hum

Khushi nahi dekhenge

Kitni bhi zid pe utre dil

Pyaar ke aage mere sapne

Ghutne nahi tekenge

Shayad Mera Kuch Kho Gaya Hai...

Shayad mera kuch kho gaya hai
Ek sapna jaagta tha har raat
Ab na jaane kis neend mein so gaya hai

Kabhi socha na tha jo
Har roz ab usko jee rahe hain
Chehakti aawazon ke mele mein
Sannaton ki dhun ko pee rahe hain

Kehte nahin ek lafz bhi
Fir bhi baat wo bayaan hai
Haan, Haan mera kuch kho gaya hai

Yaadon ki ek slate hai
Jo kabhi saaf nahi hoti
Hanste-hanste beet jaate hain din
Par khushi se mulakaat nahi hoti

Jo bhi ho, zindagi ka andaaz to naya hai
Sach hai ki mera kuch kho gaya hai

Maa kehti hai sab achche ke liye hota hai
Daagon ke baawjood bhi
Chaand apni chamak kahan khota hai

Hona tha jo woh ho gaya hai
Kabhi na kabhi badlega mausam
Mil jayega mujhe woh jo kho gaya hai.