Zindagi bechain hai
Dekho zara
Uske maathe par wo silwatein
Suno zara
Uske khwabon ki ziddi si aahatein
Zindagi besudh ho chali hai
Dekho zara
Uske haath kuch thaamna chahte hain
Suno zara
Uske honth kuch maangna chahte hain
Zindagi zid pe adi hai
Dekho zara
Taqdeer se kaise jhagad rahi hai
Suno zara
Duniya ki baaton par kaise bigad rahi hai
Ye Zindagi meri hai
Par sab kehte hain
Mere liye nahi hai
Ye unke liye hai
Jo mere khwaabon ko nahi maante
Ye unke liye hai
Jo mujhe jaankar bhi nahi jaante
Ye unke liye hai
Jo mujhe sadak par dekhte hain
Ye unke liye hai
Jo meri jalan se apne haath sekte hain
Jo asaani se jhuk jaaye
Wo meri zindagi nahi
Jo aadhe dil se ki jaaye
Ye wo bandgi nahi
Duniya mein aayi hai
To kuch karke jaayegi
Jab tak rahegi yahan
Kuch naye rang bharke jayegi
